ҚЫЗЫЛЖАРДА АРДАГЕРЛЕР КЕҢЕСІ ҒИМАРАТЫ АШЫЛДЫ
Шымкент қаласының әлеуметтік және рухани өмірінде ерекше мәнге ие игі оқиғалардың бірі – Абай ауданына қарасты Қызылжар шағын ауданында Ардагерлер кеңесінің жаңа ғимаратының ашылуы болды. Бұл нысанның бой көтеруі тек қана ардагерлерге құрмет көрсету емес, сонымен қатар ұлттың рухани тұтастығын, ұрпақтар сабақтастығын нығайтудың айқын көрінісі ретінде бағаланды.
Салтанатты шараға Шымкент қаласы әкімінің орынбасары Сәрсен Құранбек, қалалық ардагерлер кеңесінің төрағасы Кенжехан Төлебаев, зиялы қауым өкілдері мен жергілікті тұрғындар қатысты. Жиында сөз сөйлеген қала әкімінің орынбасары тұрғындармен өткен кездесулерде осындай орталықтың қажеттілігі бірнеше рет көтерілгенін атап өтті. Бұл – халықтың шынайы сұранысына дер кезінде жауап берудің нақты мысалы. Сәрсен Құранбек өз сөзінде: «Ардагерлер – елдің елдігі мен бірлігінің символы. Олардың өмірлік тәжірибесі, ақыл-парасаты мен еңбек жолы жастар үшін үлкен мектеп. Осындай ғимараттарда жас ұрпақ үлкендердің өнегесін тыңдап, отансүйгіштік рухта тәрбиеленеді», – деп атап өтті. Қызылжар шағын ауданында бүгінде екі мыңға жуық ардагер тұрады. Олар әр салада еңбек етіп, ел дамуына үлес қосқан жандар. Сондықтан жаңа ғимараттың ашылуы – олардың қоғам өміріне белсенді қатысуына, бір-бірімен тәжірибе алмасуына, жастармен тығыз байланыс орнатуына мүмкіндік беретін маңызды қадам. Айта кетерлігі, жаңа Ардагерлер кеңесі ғимараты мемлекеттік қаржы есебінен емес, демеушілердің қолдауымен салынған. Бұл да халық пен бизнестің ортақ мүдде жолындағы ынтымағын көрсетеді. Мұндай әлеуметтік жауапкершілік жобалары бүгінде қоғамның дамуында ерекше рөл атқарып отыр. Сондай-ақ, бұл бастаманы жүзеге асыруда «AMANAT» партиясының Шымкент қалалық филиалы белсенді атсалысты. Партия өкілдері құрылыс барысын бақылап, қажетті ұйымдастыру шараларына қолдау көрсетті.
Жиын барысында қалалық ардагерлер кеңесінің төрағасы Кенжехан Төлебаев ардагерлерге жасалып жатқан қамқорлыққа ризашылығын білдіріп, алдағы уақытта ғимарат жанынан Ардагерлер аллеясын ашу туралы ұсынысын айтты. Бұл бастама көпшіліктің қызу қолдауына ие болды. Тұрғындар аумақты абаттандырып, тал егіп, шағын ауданның көркін арттыруға бірауыздан келісім білдірді. Жаңа ғимарат тек жиналыс пен кездесулер өтетін орын ғана емес, рухани тәрбиенің орталығына айналмақ. Мұнда түрлі мәдени шаралар, патриоттық кездесулер, тарихи-танымдық жиындар ұйымдастыру көзделіп отыр. Ардагерлер өз тәжірибесімен бөлісіп, жастармен ашық диалог құратын, ұлт тарихын ұлықтайтын игі шаралардың ордасы болмақ. Бүгінгі таңда Шымкент қаласында ардагерлерге қамқорлық жасау бағытында көптеген іс-шаралар жүзеге асырылып келеді. Мәселен, ардагерлерге арналған аллеялар ашылып, әлеуметтік қолдау жобалары іске асырылуда. Бұл бастамалар ардагерлердің қоғам өміріндегі белсенділігін арттырып қана қоймай, жастарды отансүйгіштікке баулудың маңызды тетігіне айналып отыр. Қызылжардағы жаңа Ардагерлер кеңесінің ашылуы – осындай игі бастамалардың заңды жалғасы. Бұл ғимарат ардагерлердің бас қосып, ел болашағына қатысты ой-пікірін ортаға салатын, ұрпақтар арасындағы байланысты нығайтатын рухани орталыққа айналары сөзсіз. Жиын соңында қатысушылар жаңа ғимаратты аралап, оның ішкі жағдайымен танысты. Мұнда ардагерлердің демалып, кітап оқитын бұрышы, шағын мәжіліс залы және кездесу өткізуге арналған кең бөлмелер қарастырылған. Тұрғындар ғимараттың ыңғайлы әрі жылы атмосферасын ерекше атап өтті. Бұл игі істің жүзеге асуы – қала басшылығының, партия өкілдерінің және жергілікті тұрғындардың бірлескен еңбегінің нәтижесі. Осындай ынтымақ пен бірлік арқылы ғана ел игілігіне бағытталған жобалар табысты болатыны сөзсіз. Қызылжардағы Ардагерлер кеңесі ғимараты – өткен мен бүгіннің арасын жалғайтын рухани көпір, елдің ең қымбат қазынасы – ардагерлерге деген шынайы құрметтің көрінісі болып қала береді.
