БИЗНЕСТІ ҚОЛДАУДЫҢ ЖАҢА ҚАДАМДАРЫ ТАЛҚЫЛАНДЫ
Шымкент қаласы мәслихатындағы «AMANAT» партиясы депутаттық фракциясының кезекті отырысы өтіп, онда қала тұрғындарының әлеуметтік-экономикалық жағдайына әсер ететін маңызды мәселелер қаралды. Жиынға қалалық партия филиалы атқарушы хатшысының орынбасары Ербол Байқонысов, фракция жетекшісі Қайрат Имашев және фракция мүшелері қатысты.
Кездесуде оңайлатылған декларация негізіндегі арнаулы салық режимін пайдаланатын шағын және орта бизнес субъектілеріне қатысты маңызды ұсыныс – корпоративтік және жеке табыс салығы мөлшерлемесін 4 пайыздан 2 пайызға дейін төмендету мәселесі талқыланды. Бұл бастама өткен сессияда көтеріліп, қоғам тарапынан да үлкен қызығушылық тудырған болатын. Фракция жетекшісі Қайрат Имашев ұсыныстың мән-маңызына кеңінен тоқталып, бұл қадам кәсіпкерлер үшін айтарлықтай қолдау болатынын атап өтті. Оның айтуынша, 2026 жылдың 1 қаңтарынан бастап Салық кодексінде көзделгендей мөлшерлемені 2% деңгейінде бекіту – көлеңкелі экономиканы азайтуға, бизнесті ашық және заңды жүргізу мәдениетін қалыптастыруға ықпал етеді. Сонымен бірге, салықтың төмендеуі жаңа инвестиция тартуға, кәсіпкерліктің тұрақты дамуына және қала бюджетінің табысын арттыруға мүмкіндік береді. Фракция мүшелері бұл ұсынысты бірауыздан қолдады. Қайрат Имашев партияның кәсіпкерлерді қолдауға бағытталған бастамалары мұнымен шектелмейтінін, «AMANAT» алдағы уақытта да бизнес климатын жақсартуға күш салатынын жеткізді. Отырыста бұдан бөлек, «AMANAT» партиясының 2023–2027 жылдарға арналған «Халықпен бірге!» сайлауалды бағдарламасын жүзеге асыру мақсатында әзірленген Жол картасының орындалу барысы қаралды. Фракция жетекшісі 2025 жылға жоспарланған кейбір іс-шаралардың орындалмай қалу қаупі бар екенін атап өтті. Осыған байланысты ол фракция мүшелеріне жауапты басқармалармен бірлесіп, жоспарланған міндеттердің уақытылы әрі сапалы жүзеге асырылуын қамтамасыз етуді тапсырды.
Бұл отырыс «Халық үніне құлақ асатын мемлекет» тұжырымдамасының нақты іске асырылуының жарқын мысалы болды. Өйткені салық саясаты, бизнес қолдауы, Жол картасының орындалуы сияқты мәселелер тікелей халықтың әл-ауқатына әсер етеді. Тұрғындардың сұранысын ескеріп, шағын және орта бизнестің жұмысын жеңілдету – экономиканы дамыту арқылы қоғамның өмір сапасын жақсартудың тиімді жолы. «AMANAT» партиясының бастамалары мен атқарылып жатқан жұмыстары мемлекеттік органдардың азаматтармен ашық байланысын күшейтіп, халықтың талап-тілектерін назарда ұстайтын басқару моделінің қалыптасуына үлес қосуда.
