БАЛАЛАР ҚАУІПСІЗДІГІ МЕН ҚҰҚЫҚТАРЫН ҚОРҒАУ МӘСЕЛЕСІ ТАЛҚЫЛАНДЫ
Ұлттың болашағы – заман ағысына төтеп бере алатын, саналы да салауатты ұрпақтың қолында. Ал сол өрімдей жас өркеннің қауіпсіздігін қамтамасыз етіп, құқығын қорғау – мемлекет пен қоғамның мойнындағы ең қасиетті, ең жауапты міндет. Осы ретте, Түркістан облысында кәмелетке толмағандардың ісі және олардың құқықтарын қорғау жөніндегі комиссияның кезекті мәжілісі өтіп, өңірдегі жасөспірімдер тағдырына қатысты ең өзекті, жан ауыртарлық мәселелер ортаға салынды. Алқалы жиынға құқық қорғау органдары мен жауапты басқармалардың басшылық құрамы, сондай-ақ аудан және қала әкімдігінің өкілдері түгел жиналып, өткен жылғы атқарылған ауқымды істер мен биылғы төрт айдың қорытынды көрсеткіштерін безбенге салды, алдағы уақытта атқарылатын кешенді жоспарларды бекітті. Облыс әкімінің орынбасары Ертай Алтаевтың төрағалығымен өткен бұл басқосу жай ғана ресми жиын емес, бала қауіпсіздігіне бейжай қарамайтын, ел ертеңіне алаңдаған азаматтардың ашық та өткір диалог алаңына айналды.
Жиын тізгінін ұстаған Ертай Кенжебекұлы күн тәртібіндегі негізгі мәселелерге тоқтала келе, балалардың құқығын шегелеп, қауіпсіздігін қатаң сақтаудың маңыздылығын алға тартты. Өңірде осы бағытта бірқатар ауыз толтырып айтарлықтай нәтижелі жұмыстар атқарылғанымен, кейбір аудандарда әлі де болса селқостық пен кемшіліктерге жол беріліп отырғанын ашық айтып, сынға алды. Облыс басшысының орынбасары жасөспірімдер арасындағы жантүршігерлік суицид пен ерте жүктіліктің алдын алу бағытындағы жұмыстарды шұғыл арада ширатуды, мектептердегі психологтардың қызметін жүйелеп, жаңа деңгейге көтеруді қатаң тапсырды. Оның үстіне, дәл қазіргі уақытта мектеп қабырғасын бітіріп, үлкен өмірге жолдама алғалы тұрған түлектердің Ұлттық бірыңғай тестилеу тапсыратын сындарлы сәті таяп қалды. Бұл шақ – жасөспірімдер үшін үлкен психологиялық қысым кезеңі болғандықтан, олармен дер кезінде тиісті түсіндірме жұмыстарын жүргізіп, қауіпсіздігін кірпік қақпай қадағалау қажеттігі ерекше аталды. Сонымен қатар, алда келе жатқан мереке күндері мен жазғы ұзақ демалыс кезінде балаларды түрлі қауіп-қатерден, су мен оттан аман сақтау мақсатында кешенді профилактикалық шараларды үзіліссіз жүргізу міндеттелді.
Мәжілістің негізгі өзегі де, қызу талқыға түскен тұсы да осы балалардың қауіпсіздігі, кәмелетке толмағандар арасындағы құқықбұзушылықтың алдын алу, мүгедектігі бар балалардың отбасылық және әлеуметтік жағдайын жақсарту мәселелері болды. Жиында облыстың жауапты мекеме өкілдерінің есептері мұқият тыңдалып, талдау жасалды. Әсіресе, жасөспірімдер арасында теріс қылықтар мен құқықбұзушылық деректері жиі тіркелген аудандардың есептері жеке қаралып, олардың басшыларына нақты тапсырмалар мен қатаң міндеттер жүктелді. Бала тәрбиесі мен қауіпсіздігінде салғырттық танытуға ешкімнің құқығы жоқ екені тағы бір мәрте ескертілді. Жиынды қорытындылаған облыс әкімінің орынбасары Ертай Алтаев ортаға салынған барлық ұсыныс-пікірлерді назарға ала отырып, бұл бағыттағы жұмыстарды бір сәтке де бәсеңдетпей, күшейтуді тапсырды. Өзекті түйткілдер бойынша тиісті құзырлы мекемелер тарапынан нақты, батыл шаралар қабылданып, олардың орындалу барысы тұрақты түрде облыс басшылығының тікелей бақылауында болатынын қадап айтты. Түптеп келгенде, Түркістан топырағындағы әрбір сәбидің күлкісі мен әрбір жастың қауіпсіздігі – аймақтың басты құндылығы болып қала бермек.
