МАҚТААРАЛДА ШАҒЫН ЕЛДІ МЕКЕНДЕ СПОРТ ЖӘНЕ БАЛАЛАР ОЙЫН АЛАҢШАСЫ АШЫЛДЫ
Мырзашөлдің мақталы өлкесіндегі Мақтаарал ауданы бүгінде тек диқаншылығымен ғана емес, ауыл-аймақты абаттандыру, бұқаралық спортты өркендету ісінде де өзгелерге өнеге көрсетіп келеді. Осының бір айқын дәлеліндей, жақында ғана ауданға қарасты Ж.Нұрлыбаев ауылдық округінің құрамындағы Өркен елді мекенінде үлкен дүбірлі жиын өтіп, жергілікті жұртшылық ерекше қуанышқа кенелді. Бес жүзден астам ғана түтіні бар, бірлігі жарасқан шағын ауылда заманауи үлгідегі кіші футбол алаңы мен балалардың ойын алаңшасы салтанатты жағдайда пайдалануға берілді. Бұл жаңалық көптен бері көк майса орталық іздеп, спортқа сусап отырған ауыл балалары мен жастары үшін нағыз тосынсый болғаны анық.
Кез келген елді мекеннің еңсесін тіктеп, болашағын бағамдау үшін ең алдымен ондағы өскелең ұрпақтың салауатты өмір салтына деген ынтасын ояту қажет. Өркен ауылында бой көтерген жаңа спорттық кешен дәл осы мақсаттың үдесінен шығып тұр. Нысанның ашылу салтанатына арнайы қатысқан аудан әкімінің орынбасары Бижан Анарбеков тұрғындарды ақ түйенің қарны жарылған қуанышты күнмен құттықтап, жылы лебізін білдірді. Өз сөзінде Бижан Шералыұлы Өркеннің шағын ғана ауыл болғанына қарамастан, бүгінде халықтың жайлы да қолайлы өмір сүруі үшін барлық мемлекеттік қамқорлықтың жасалып жатқанын тілге тиек етті. Шындығында да, бұл ауылда білім беретін мектеп, балдырғандарды баулитын балабақша, ең бастысы — табиғи газ бен мөлдір ауыз су, тақтайдай тегіс жол секілді негізгі инфрақұрылымдардың барлығы толығымен тартылған. Ал енді бұл тізімге жастардың бос уақытын тиімді өткізіп, денсаулығын шыңдауына жол ашатын спорт алаңы қосылып, ауылдың ажарын аша түсті.
Жаңадан бой көтерген бұл заманауи нысан тек футбол ойнайтын жер ғана емес, тұтас бір көпфункционалды спорттық демалыс орталығы десек қателеспейміз. Мұнда халықаралық талаптарға сай қоршалған, үстіне сапалы жасанды көгал төселген кіші футбол алаңы салынған. Тұрғындар үшін ең тиімдісі — алаңның арнайы жарықтандыру жүйесімен жабдықталуы. Бұл дегеніңіз, күндізгі ыстықта егіс даласында, жұмыста жүретін ауыл жастары кешкі уақытта да алаңсыз спортпен шұғылдана алады деген сөз. Сондай-ақ кешен аумағында волейбол әуесқойларына арналған арнайы алаңша да қарастырылған. Ал одан сәл аттап өтсеңіз, балдырғандардың күлкісі естілетін балалар әлеміне тап боласыз. Мұнда кішкентай бүлдіршіндерге арналған түрлі сырғанақтар, әткеншектер, өрмелеу құрылғылары мен заманауи воркаут жаттығу нысандары қойылған. Ата-аналар мен үлкен кісілердің жас ұрпақтың ойынын тамашалап, демалуы үшін көлеңкелі шатырлар мен ыңғайлы орындіктер орнатылып, жаяу жүргіншілер жолы төселген. Бір сөзбен айтқанда, ауыл балаларының қауіпсіз әрі таза ортанда өсіп-жетілуіне толық жағдай жасалған.
Мұндай игілікті іске ауыл ақсақалдары мен ақжаулықты аналардың да ризашылығы шексіз. Салтанатты шара барысында жүрегі жарыла қуанған тұрғындар өздерінің ақ батасы мен алғыстарын жаудырды. Осынау игі бастаманың жүзеге асуына мұрындық болған атқарушы билікке, жергілікті әкімдікке халық атынан дән риза көңілдерін жеткізді. Көпшіліктің айтуынша, бұл нысан тек жастардың салауатты өмір салтын ұстануына ғана емес, ауыл ішіндегі ауызбіршілік пен ынтымақты бекемдей түсуге де үлкен септігін тигізбек. Осы қуанышқа орайлас келген тағы бір тағылымды шара — А.Тұяқбаев атындағы жалпы орта мектептің 2006 жылғы түлектерінің алтын ұя мектепті бітіргендеріне 20 жыл толуына орай ұйымдастырған кездесуі болды. Ауылдың атпал азаматтары осынау жаңа алаңның тұсауын кесе отырып, өз араларында кіші футболдан қызықты турнир ұйымдастырды. Дүбірлі жарыс соңында ауыл жұртшылығына арнайы ас беріліп, өткен күндерден естеліктер айтылды. Бұл — жаңа нысанның ашылуын одан сайын мәнді ете түскен, ұрпақтар сабақтастығын көрсеткен әдемі көрініс болды.
Айта кетерлігі, бұл тамаша жоба аспаннан түскен жоқ, ол мемлекет пен халық арасындағы алтын көпірдің нәтижесі. Жаңа спорт және ойын алаңшасы төртінші деңгейлі бюджет қаражаты есебінен Ж.Нұрлыбаев ауылдық округі әкімдігі тарапынан салынды. Ең маңыздысы — бұл жобаның ең әуелі ауыл тұрғындарының өздері ұсынған өтініштері мен талап-тілектері негізінде жүзеге асырылғандығында жатыр. Халық үніне құлақ асатын мемлекеттің жарқын үлгісін көрсеткен бұл бастама бүгінде көпшіліктің игілігіне айналып, Өркен ауылының ертеңгі күнге деген сенімін нығайта түсті. Шағын ауылдың үлкен қуанышы құтты болып, мұнда еліміздің көк туын желбірететін болашақ чемпиондар тәрбиеленіп шықсын деп тілейміз.
