АРЫСТА 42 ИНВЕСТИЦИЯЛЫҚ ЖОБА ЖҮЗЕГЕ АСАДЫ
Түркістан облысының әлеуметтік-экономикалық дамуына серпін беретін бастамалардың бірі – облыс әкімі Нұралхан Көшеровтің Арыс қаласына жасаған жұмыс сапары болды. Бұл сапар аясында аймақ басшысы өңірдің даму көрсеткіштерін саралап қана қоймай, нақты тапсырмалар беріп, алдағы жоспарларды белгіледі. Арыс қаласының стратегиялық әлеуеті, орналасқан жері мен табиғи мүмкіндіктері оның Түркістан облысының ғана емес, бүкіл елдің экономикалық белсенді орталықтарының біріне айналуына мүмкіндік береді.
Өткен мәжілісте қала әкімі Қайсар Маңқараев пен басқарма басшылары өз салалары бойынша атқарылған жұмыстар мен алдағы міндеттерді баяндады. Негізгі назар ауыл шаруашылығын, өндірісті, туризмді және сауда саласын дамытуға аударылды. Облыс әкімі атап өткендей, Арыс – географиялық жағынан қолайлы орналасқан қала. Бұл жағдайды тиімді пайдалану арқылы жаңа өндірістік аймақтар құру, ірі инвестициялық жобаларды іске асыру, сауда және қызмет көрсету секторларын дамытуға толық мүмкіндік бар. Экономиканы әртараптандыру – мәжілісте қозғалған басты тақырыптардың бірі болды. Облыс әкімі Нұралхан Көшеровтің пікірінше, Арыс қаласы бір ғана саланың дамуына тәуелді болмауы керек. Бұл үшін ауыл шаруашылығын жетілдірумен қатар, көтерме және бөлшек сауданы жандандырып, қызмет көрсету секторын дамыту маңызды. Мұндай қадам бюджет кірістерін арттырып, қала экономикасын тұрақты етуге мүмкіндік береді. Әсіресе кірістер басқармасымен бірлескен жұмыстарды күшейту қажеттігіне баса назар аударылды. Жергілікті инфрақұрылымды дамыту да күн тәртібінде болды. Қала тұрғындарына қолайлы жағдай жасау үшін жол, инженерлік желілер, әлеуметтік нысандардың сапасы артуы тиіс. Бұл тек халықтың тұрмысын жеңілдетіп қана қоймай, инвесторларды тартуда шешуші рөл атқарады. Инфрақұрылымдық даму инвестициялық жобалардың сәтті жүзеге асуына ықпал етіп, жаңа өндіріс орындарының ашылуына жағдай жасайды.
Арыс қаласының 2025 жылға дейінгі даму жоспары аясында жалпы құны 48,9 млрд теңгені құрайтын 42 инвестициялық жоба жүзеге асырылмақ. Бұл жобалар түрлі салаларды қамтиды және қаланың экономикасын жаңа деңгейге көтеруді көздейді. Жылдың алғашқы жартысында жалпы құны 20,4 млрд теңгені құрайтын 21 жоба іске асырылғаны – оң нәтиже. Жыл соңына дейін тағы 12 жоба қолға алынып, оның жалпы құны 14 млрд теңге болмақ. Сонымен қатар құны 14,5 млрд теңге болатын 9 жоба 2026 жылға өтпелі болып отыр. Бұл көрсеткіштер Арыстың инвестициялық тартымдылығының артып келе жатқанын дәлелдейді. Айрықша атап өтерлік жоба – 30 гектар аумақта жаңа индустриялық аймақ ашу жоспары. Бұл аймақ шағын және орта кәсіпкерлікті дамытуға, жаңа өндірістерді іске қосуға мүмкіндік береді. Индустриялық аймақ кәсіпорындарды инфрақұрылыммен қамтамасыз етіп, кәсіпкерлерге қолайлы жағдай жасайды. Мұндай бастама қала экономикасының өркендеуіне, жаңа жұмыс орындарының ашылуына және халықтың табысын арттыруға елеулі үлес қосады. Арыс қаласында жүзеге асатын жобалар тек экономикалық емес, әлеуметтік маңызы бар бастамаларға жатады. Жаңа өндіріс орындары ашылған сайын жұмыссыздық деңгейі төмендеп, тұрғындардың әл-ауқаты жақсарады. Сонымен қатар әлеуметтік инфрақұрылымның дамуы халықтың өмір сапасын арттыруға ықпал етеді.
Аймақ басшысы мәжіліс барысында мемлекеттік бағдарламалардың тиімді орындалуының маңыздылығын ерекше атап өтті. Бағдарламаларға бөлінген қаражаттың уақытылы әрі мақсатты игерілуі – өңірдің тұрақты дамуына жол ашады. Сонымен қатар әкім инвестиция тарту ісін күшейту қажеттігін қадап айтты. Қазіргі таңда шетелдік және отандық инвесторлар үшін Арыс қаласы тартымды бағыттардың біріне айналуда. Бұл үрдісті әрі қарай дамытып, қолда бар мүмкіндіктерді барынша пайдалану – жергілікті биліктің басты міндеті. Сарапшылардың пікірінше, Арыс қаласының даму стратегиясы аймақ экономикасының әртараптануына, жаңа жұмыс орындарының ашылуына және тұрғындардың әл-ауқатының артуына негізделген. Қаладағы инвестициялық жобалардың көлемі мен саны артқан сайын әлеуметтік тұрақтылық та нығая түседі. Қорытындылай келе, Нұралхан Көшеровтің Арыс қаласына жасаған сапары өңірдің дамуындағы жаңа кезеңнің басталғанын көрсетеді. Қойылған міндеттер – нақты, жүзеге асатын жобалар – айқын. Мемлекеттік бағдарламаларды тиімді жүзеге асыру, инвестициялық климатты жақсарту және халықтың өмір сапасын арттыру – Арыс қаласының алдағы жылдардағы басты басымдықтары болып қала бермек. Егер белгіленген жоспарлар толық жүзеге асса, Арыс Түркістан облысының ғана емес, еліміздің де экономикалық дамуына елеулі үлес қосатын орталыққа айналуы әбден мүмкін.
