ҚОҒАМДЫҚ КЕҢЕС ОТЫРЫСЫНДА АУДАН ӘКІМДЕРІ МЕН САЛА БАСШЫЛАРЫНЫҢ ЕСЕПТЕРІ ТЫҢДАЛДЫ
Шымкент қаласында Қоғамдық кеңестің кезекті отырысы өтіп, онда қаланың әлеуметтік-экономикалық дамуына қатысты өзекті мәселелер талқыланды. Кеңес төрағасы Бұхарбай Рысқұлұлы Парманов жүргізген жиынға кеңес мүшелері, мемлекеттік орган өкілдері және бұқаралық ақпарат құралдарының журналистері қатысты. Мұндай басқосулар билік пен қоғам арасындағы ашықтықты қамтамасыз етудің, сондай-ақ тұрғындардың мүддесін қорғаудың тиімді құралы болып отыр.
Жиынның басында кеңес құрамына жаңа мүше қабылданып, Артур Дрейлинг ресми түрде кеңес мүшесі атанды. Бұл кеңестің әлеуетін күшейтіп, қоғамдық бақылауды жүзеге асырудағы мүмкіндіктерін арттыра түспек. Күн тәртібіне сәйкес бірқатар салалық басшылардың есептері тыңдалды. Олардың ішінде Еңбекші ауданының әкімі Д.Есілбек, Қаратау ауданының әкімі А.Абаев, Шымкент қаласының білім саласында сапаны қамтамасыз ету департаментінің басшысы Р.Әліш және кәсіпкерлік пен индустриалды-инновациялық даму басқармасының басшысы Б.Азимбердиев бар. Әрбір баяндама қала тұрғындарының тұрмысына тікелей әсер ететін маңызды бағыттарды қамтыды. Аудан әкімдері өз баяндамаларында халықпен байланысты нығайту, аумақтың тазалығы, аяқ жолдардың жағдайы сияқты мәселелерді алға тартты. Еңбекші және Қаратау аудандарында тұрғындармен тұрақты қарым-қатынас орнатылғаны айтылып, бұл бағытта нақты жұмыстар атқарылып жатқаны көрсетілді. Дегенмен, қоғамдық кеңес мүшелері бұл салада әлі де жетілдіруді қажет ететін тұстар бар екенін атап өтті. Білім сапасын қамтамасыз ету департаментінің есебі де назарға ұсынылды. Департамент сегіз маманнан құралған құрылым болса да, білім беру сапасын бағалау, лицензиялау, мемлекеттік бақылау, мониторинг жүргізу, балалардың құқықтарын қорғау және ақпараттық-түсіндіру жұмыстарын атқарып отыр. Сонымен бірге консультативтік-кеңесші орган жұмыс істейді. 2025 жылы департамент білім беру саласындағы заңнамалардың орындалуын бақылауға бағытталған іс-шараларды іске асырған. Бұл білім сапасын арттырумен қатар, балалардың құқықтарын қорғау ісіне де тың серпін беруде.
Кәсіпкерлік пен индустриалды-инновациялық даму басқармасының деректеріне сүйенсек, 2025 жылдың 1 шілдесіне дейін қалада 798 белсенді кәсіпорын жұмыс істейді. Оның ішінде 18-і ірі, 43-і орта, ал 737-сі шағын бизнес субъектілері. Өңдеу өнеркәсібінде 696 кәсіпорын еңбек етіп, биылғы қаңтар-шілде айларында 812,6 млрд теңгенің өнімі өндірілген. Бұл өткен жылмен салыстырғанда 15,8 пайызға артық көрсеткіш. Мұндай өсім қаланың инвестициялық тартымдылығы мен кәсіпкерлік белсенділігінің артып келе жатқанын дәлелдейді. Жиын соңында кеңес мүшелері баяндамашыларға өз сұрақтарын қойып, ұсыныстарын ортаға салды. Әсіресе, инфрақұрылым сапасын жақсарту, кәсіпкерлікті қолдау және білім беру саласында бақылауды күшейту мәселелері көтерілді. Қоғамдық кеңес төрағасы Бұхарбай Рысқұлұлы Парманов барлық айтылған ұсыныстар мен сын-пікірлер қоғамдық бақылауда болатынын атап өтті. Бұл отырыс тағы бір мәрте Қоғамдық кеңестің қоғам үшін маңызды рөл атқаратынын көрсетті. Ашық пікір алмасу арқылы қабылданған шешімдер тұрғындардың тұрмысын жақсартуға бағытталып, билікке деген сенімді нығайтады. Қоғамдық кеңес – халық пен билік арасындағы диалог алаңы ғана емес, қоғамның даму бағытын айқындауға үлес қосатын маңызды институт екені анық.
