ЕҢБЕК АДАМЫНА ҚҰРМЕТ ПЕН ӘЛЕУМЕТТІК ҚОЛДАУ – БАСТЫ НАЗАРДА
Қазақстан Республикасы Конституциясының 30 жылдығы қарсаңында елдің барлық өңірінде еңбек адамын қолдауға, әлеуметтік көмек көрсетуге бағытталған іс-шаралар жалғасуда. Осы орайда, Шымкент қаласында «Қалың қалай, бастауыш ұйым?» және «Мектепке жол» акциялары аясында кездесу болды.
Бұл жиынға «Қызмет» салалық кәсіподағы Шымкент қалалық филиалының төрағасы Серік Әуесханов, Абай ауданы әкімі аппаратының «Абай» коммуналдық мемлекеттік мекемесінің басшысы Кегенхан Атамқұлов, бастауыш кәсіподақ ұйымының төрағасы Мұхтар Бейсен және кәсіподақ мүшелері қатысты. Басқосудың негізгі мақсаты – жұмысшылардың жағдайымен танысу, еңбек қатынастары мен қауіпсіздік талаптарын түсіндіру және кәсіподақ қызметінің нәтижелерімен бөлісу болды. Кездесу барысында еңбек заңнамасы, қызметкерлердің құқықтары, сондай-ақ еңбек және техника қауіпсіздігі мәселелері кеңінен талқыланды. Бұл түсіндіру жұмыстары қарапайым еңбеккерлердің құқықтық сауаттылығын арттыруға, олардың еңбек қауіпсіздігін қамтамасыз етуге бағытталғаны байқалды. Жиын соңында мерекелік марапаттау рәсімі ұйымдастырылды. Жұмысшыларға Абай ауданы әкімінің, мекеме басшысының «Алғыс хаттары» табысталып, кәсіподақ тарапынан «Еңбек озаты» төсбелгілері мен «Құрмет грамоталары», сондай-ақ «Алғыс хаттар» салтанатты түрде тапсырылды. Мұндай марапаттар қызметкерлердің еңбегін мойындаудың және олардың жұмысқа деген ынтасын арттырудың айқын көрінісі саналады. Сонымен қатар, дәстүрлі «Мектепке жол» акциясы аясында әлеуметтік қолдаудың маңызды қадамы жасалды. Мекеме қызметкерлерінің мектеп жасындағы 120 баласына оқу құрал-жабдықтары табыс етілді. Бұл – жаңа оқу жылы қарсаңында ата-аналарға үлкен көмек қана емес, балалар үшін де қуаныш сыйлайтын игі бастама. Әлеуметтік жауапкершілік тұрғысынан алғанда, кәсіподақтың бұл ісі – отбасы құндылығына, жас ұрпақтың сапалы білім алуына жасалған нақты қолдау.
Мұндай шаралар еңбек адамына деген құрметтің және әлеуметтік әділеттіліктің нақты көрсеткіші болып отыр. Кәсіподақ ұйымдары тек еңбек құқығын қорғаушы ғана емес, сонымен бірге қызметкерлердің тұрмыс сапасын жақсартуға, олардың отбасыларына жан-жақты көмек көрсетуге бағытталған қоғамдық институт екенін тағы бір мәрте дәлелдеді. Қорытындылай келе, Абай ауданында өткен кездесудің мәні зор. Ол бір жағынан еңбек ұжымдарының мәселелерін анықтап, құқықтық және әлеуметтік тұрғыда қолдау көрсетсе, екінші жағынан – жас буынға қамқорлық жасау арқылы болашаққа бағытталған жауапты қадам болды. Бұл тәжірибе қоғамдағы әлеуметтік әріптестіктің тиімді үлгісін көрсетіп, еңбек адамының мәртебесін арттыруға ықпал етуде.
