КОНСТИТУЦИЯ – ЕЛДІКТІҢ АЙБЫНЫ МЕН БІРЛІКТІҢ БЕЛГІСІ
Қазақстан Республикасының Конституциясы – еліміздің құқықтық жүйесінің іргетасы, тәуелсіздігіміздің тұғыры, халықтың бірлігі мен мемлекетіміздің тұрақтылығының кепілі. Осы маңызды құжаттың қабылданғанына биыл 30 жыл толып отыр. Шымкент қаласында бұл тарихи белеске арналған «Ата Заңым – айбыным» атты салтанатты іс-шараның өтуі ел азаматтары үшін зор мәнге ие болды.
Мерекелік кеш «Қызғалдақ» сарайында ұйымдастырылып, қала әкімі Ғабит Сыздықбеков, мәслихат депутаттары, қоғам қайраткерлері, өнер және мәдениет өкілдері мен қала тұрғындарын бір арнаға тоғыстырды. Бұл жиын тек мерекелік сипатта ғана емес, сонымен қатар құқықтық мәдениетті арттыруға, азаматтардың Ата Заңға деген құрметін күшейтуге бағытталды. Іс-шара мемлекеттік рәміздерге құрмет көрсетумен басталды. Сахнаға Мемлекеттік Ту мен Конституция алып шығып, Әнұран шырқалды. Арнайы дайындалған бейнеролик арқылы көрермендер тәуелсіздік тарихына, Конституцияның қалыптасуына шолу жасап, елдің жүріп өткен жолына көз жүгіртті. Бұл сәт мерекенің айрықша рухын сезінуге мүмкіндік берді. Шымкент қаласының әкімі Ғабит Сыздықбеков құттықтау сөзінде Конституцияның ел дамуы үшін маңызын атап өтті. Оның айтуынша, соңғы отыз жылдағы жетістіктердің барлығы Ата Заң қағидаттарына сүйенудің, халық бірлігінің және мемлекет тұрақтылығының жемісі. Әкімнің «Ата Заңымызды қастерлеп, болашақ ұрпаққа аманат етуіміз керек» деген сөзі кештің басты мазмұнын айқындап берді.
Жиын барысында ел дамуына елеулі үлес қосқан азаматтар марапатталды. Мемлекеттік медальдарды алғандардың арасында денсаулық сақтау, білім беру, мемлекеттік қызмет, құқық қорғау саласының өкілдері бар. Бұл – қоғамның әр саласында еңбек етіп жүрген адамдардың еңбегін бағалаудың, еңбек адамына құрмет көрсетудің айқын көрінісі. Сонымен қатар, Алғыс хат алған азаматтар да бар, олардың еңбегі жергілікті деңгейде еленіп, қоғам алдындағы жауапкершілігі атап өтілді. Мерекелік кеш тек ресми бөліммен шектелмей, мәдени-рухани сипатымен де ерекшеленді. Көрермендер патриоттық әндерді тыңдап, ұлттық би ансамбльдерінің өнерін тамашалады. «Көшпенділер», «Қыран бүркіт», «Алаш ұраны» сынды ұлттық туындылар ел рухын көтеріп, көрермендердің жүрегіне отаншылдық сезім ұялатты. Бұл – Конституция тек құқықтық құжат қана емес, халықты бірлікке, елді сүюге шақыратын рухани негіз екенін тағы бір дәлелдеді. Қорыта айтқанда, Шымкент қаласында өткен Конституция күніне арналған салтанатты жиын елдіктің мерейін өсіріп, қоғамға серпін берді. Мұндай іс-шаралар азаматтардың заңға деген құрметін арттыруға, патриоттық сезімін күшейтуге ықпал етеді. Ең бастысы – Ата Заңымыздың басты қағидаттары күнделікті өмірде жүзеге асып, халықтың игілігіне қызмет етуі. 30 жылдық мереке осы ойды тағы бір мәрте айқындап берді.
