ОҚУШЫЛАРДЫҢ БОЙЫНДА ЖАҚСЫ ҚАСИЕТТЕРДІ ҚАЛЫПТАСТЫРУҒА БАҒЫТТАЛҒАН ШАРА ӨТТІ
Шымкент қаласы Қаратау ауданына қарасты №132 жалпы орта білім беретін мектепте мектеп психологы Айтбаева Алуа оқушылармен «Өмір – бақыт» атты мотивациялық-психологиялық тренинг өткізді. Топтық жұмыс формасында өткен бұл шара жасөспірімдердің өмірге деген оң көзқарасын қалыптастыруға, өзін құрметтеу мен ішкі үйлесімді сезінуге бағытталды.
Тренинг барысында оқушылар қуаныш, мағына, құндылық, бақыт сезімі секілді өмірлік маңызды ұғымдарды талқылап, олардың адамның жеке дамуы мен эмоционалдық әл-ауқатына тікелей әсерін түсінді. Балалар күнделікті өмірде бақытты сезінудің түрлі жолдарын анықтап, өз бойындағы жақсы қасиеттерді тануға үйренді. Бұл олардың өз-өзіне деген сенімін нығайтып, мақсат қою және әрекет ету мәдениетін дамытуға ықпал етті. «Өмір – бақыт» тренингі «Адал азамат» біртұтас тәрбие бағдарламасының құндылықтарымен үндеседі. Бағдарлама жасөспірімдердің өзін-өзі дамытуына, өмірлік ұстанымын дұрыс қалыптастыруына, жеке жауапкершілік пен ішкі мәдениетті нығайтуына бағытталған. Оқушылардың эмоционалдық саулығы, өзіне сенімі және жағымды ойлау дағдылары – адал, парасатты, өмірге белсенді көзқараспен қарайтын азамат тәрбиелеудің маңызды бөлігі. Тренинг барысында оқушылар өмірдің әр сәтін бағалау, өзінің күшті жақтарын тану, қиындыққа төтеп беру және жағымды энергия қалыптастыру тәсілдерін тәжірибе жүзінде орындады. Шынайы бақыттың сыртқы жағдайға емес, адамның ішкі дүниесіне байланысты екендігі туралы ойлармен бөлісті.
Тренингтің негізгі мақсаты – қатысушыларға өмірдің маңызын түсіндіру, олардың жеке бақыт формуласына дұрыс бағыт беру және мотивацияны арттыру. Мұндай іс-шаралар оқушылардың психологиялық саулығына оң әсер етіп қана қоймай, жауапкершілігі жоғары, жан-жақты дамыған, саналы жас ұрпақ қалыптастыру жолында маңызды рөл атқарады. Айта кету керек, психологиялық тренингтер – бұл тек ойын-сауық емес, сонымен қатар оқушылардың жеке тұлғалық дамуына, әлеуметтік дағдыларын жетілдіруге және эмоционалдық тұрақтылығын нығайтуға бағытталған маңызды процесс. Оқушылардың психикалық денсаулығын қорғау және дамыту үшін осындай тренингтердің маңызы зор. Тұлғаның толыққанды дамуы – қоғамның болашағы үшін маңызды, сондықтан психологиялық тренингтерді енгізу мен дамыту бүгінгі күннің басты міндеттерінің бірі екенін ұмытпауымыз керек.
