БАЛАБАҚШАЛАРДЫ ЛИЦЕНЗИЯЛАУ ІСІ ҚАШАН ЖҮЗЕГЕ АСАДЫ?
Мектепке дейінгі білім ұйымдарын лицензиялау жұмыстары тиісті құжаттар қабылданған соң, 2024 жылы бастау алуы мүмкін. Лицензиялау ешқандай кәсіпкерліктің, яғни меншік иесінің құқығын шектемейді. Бұл балаларды сапалы біліммен және жайлы ортамен қамту үшін жасалған қадам ғана. Яғни, жекеменшік және мемлекеттік балабақшалар толығымен лицензиялаудан өтеді. Бұл туралы Шымкент қаласының білім саласында сапаны қамтамасыз ету департаментінің басшысы Нұргүл Шәмшиева мәлімдеді.
Жалпы мемлекет басшысы Қасым-Жомарт Тоқаев Үкіметтің кеңейтілген отырысында балабақшаларды лицензиялауды тапсырған болатын. Демография мен республикаішілік урбанизацияға байланысты елімізде бүлдіршіндерді мектепке дейінгі тәрбиемен қамтамасыз ету мүмкіндігі азайған кезеңде, яғни 2011 жылы «Балапан» бағдарламасы бастау алып, жекеменшік балабақшаларды дамытуға мүмкіндік берілген еді. Алдағы уақытта балалардың қауіпсіздігі үшін лицензиялау жұмысы қолға алынып отыр. Мұндай іс-шара мемлекеттік құжатқа негізделіп жүргізіледі. Ол үшін, әуелі, лицензиялаудың негізгі талаптары айқындалады. Екінші, қоғамдық талқылау өтеді. Сонан соң ғана тиісті шешім негізінде жұмыс басталады. Яғни, лицензиялау жұмыстары шамамен 2024 жылы бастау алуы мүмкін. Мамандардың сөзіне сенсек, лицензиялау жұмыстары кезең-кезеңімен жүзеге асады. Бірінші кезекте жаңадан ашылған балабақшалар, екінші алғашқы мемлекеттік аттестациялаудан өтпеген мектепке дейінгі ұйымдар, үшінші жұмыс істеп тұрған барлық балабақшалар өтеді. Жалпы Шымкентте 505 мектепке дейінгі ұйым бар. Оның 72-сі – мемлекеттік. Балабақшаларды лицензиялау жұмысы туралы ақпаратты дұрыс түсінбей отырған ұйымдар да баршылық. Алайда, балаға қауіпсіз орта қалыптастырып, жертөледе немесе жарықсыз ғимаратта балабақша ашып отырғандардың жұмысын шектеп, сапаны арттыру көзделіп отыр. Сондай-ақ, биыл елордада балабақшаларды ваучерлік жүйе арқылы қаржыландыру бойынша пилоттық жоба енгізілді. Мұнда ата-аналарға баласына сапалы білім беретін балабақша таңдау құқығы беріліп отыр.
