ТҮРКІСТАНДА ӘЛЕУМЕТТІК ҚОЛДАУ КҮШЕЙІП КЕЛЕДІ
Түркістан қаласында 2025 жылдың алғашқы бес айында әлеуметтік салада ауқымды және жүйелі жұмыстар атқарылды. Әсіресе, ерекше қажеттілігі бар азаматтарды қолдау, олардың өмір сүру сапасын арттыру, қоғамдағы орнын күшейту бағытында маңызды нәтижелерге қол жеткізілді. Бұл — Мемлекет басшысының «Әлеуметтік әділеттілік – әділетті Қазақстанның өзегі» деген ұстанымының өңірлік деңгейде нақты іске асып жатқанын айғақтайды.
Бүгінгі таңда Түркістан қаласында 12 031 ерекше қажеттілігі бар азамат ресми түрде тіркелген. Олардың 7583-і жеке оңалту бағдарламасымен қамтылған, бұл шамамен жалпы тіркелген азаматтардың 63%-ын құрайды. Жеке оңалту бағдарламалары – адамның физикалық, психологиялық және әлеуметтік мүмкіндіктерін қалпына келтіруге бағытталған арнайы шаралар кешені. Бұл көрсеткіш – инклюзияны қамтамасыз ету бағытында жүргізіліп жатқан жүйелі жұмыстың көрсеткіші. 2025 жылдың қаңтар-мамыр айларында Түркістан қаласы әкімдігінің әлеуметтік сала мамандары мүмкіндігі шектеулі жандардан 6325 өтініш қабылдаған. Оның ішінде 4033 азамат нақты құралдармен, қызметтермен және оңалту бағдарламаларымен қамтылған. Бұл 63%-дан астам өтініштің қанағаттандырылғанын білдіреді.
Ерекше жандардың күнделікті өміріне қажетті қозғалыс еркіндігі де қамтамасыз етілуде. Атап айтқанда, 11 инватакси тұрақты түрде жұмыс істейді, оларды 211 адам қолданады. 4 әлеуметтік такси арқылы 51 азаматқа күнделікті көлік қызметі көрсетілуде. Күндізгі қатынау орталығы 50 ерекше балаға жүйелі түрде қолдау көрсетіп отыр. Бұл – әлеуметтік қызметтердің тек формалды емес, нақты нәтиже беретін, қамқорлық пен қолжетімділікке негізделген үлгісі. Мемлекеттік саясаттың негізгі бағыттарының бірі — инклюзивті қоғам құру, яғни әрбір азаматтың құқықтарын қорғау, әлеуметтік теңдікті сақтау, ортаға бейімделуге жағдай жасау. Түркістан қаласында жүргізіліп жатқан шаралар осы ұстанымның толық жүзеге асқанын көрсетеді — оңалту құралдарына жоғары қолжетімділік, көмекші қызметтердің толық қамтамасыз етілуі, әлеуметтік көлік пен логистиканың нақты жолға қойылуы, мемлекеттік қызметтердің түсінікті және ыңғайлы түрде ұсынылуы.
Түркістан қаласында мүмкіндігі шектеулі азаматтарды қолдау шаралары нақты цифрлармен және жүйелі әрекетпен дәлелденіп отыр. Бұл тек әлеуметтік қызмет көрсету емес, бұл — қоғамдағы ең әлсіз топтардың құқықтарын мойындау, олардың әлеуетін ашуға жағдай жасау, адами капиталды дамытудың маңызды бөлігі. Әлеуметтік қызметкерлер мен жергілікті биліктің бұл бағыттағы жұмысы — тек міндет емес, ел болашағына, қоғамның моральдық деңгейіне қосқан үлесі.
