“АГРЕССИЯ МЕН НӘСІЛДІК АЛАЛАУДЫҢ СТРАТЕГИЯЛАРЫ” ТАҚЫРЫБЫНДА ТРЕНИНГ ӨТТІ
Шымкент қаласы А.П. Чехов атындағы №21 жалпы орта білім беретін мектебінде педагог-психолог З.Касимова 9-сынып оқушыларымен “Агрессия мен нәсілдік алалаудың стратегиялары” тақырыбында психологиялық тренинг өткізді. Бұл іс-шара «Адал азамат» біртұтас тәрбие бағдарламасының негізгі қағидаларына сәйкес ұйымдастырылып, оқушылардың эмоционалдық интеллектін дамытуға, өз эмоциясын дұрыс тануға, басқаруға және бейбіт жолмен білдіруге үйретуге бағытталды.
Тренингтің негізгі мақсаты – мектептегі психологиялық климатты нығайту, жасөспірімдердің өз эмоциясын реттеу дағдыларын қалыптастыру, ашулану мен агрессияны бақылауды үйрету болды. Қазіргі қоғамда балалар мен жасөспірімдердің мінез-құлық ерекшеліктері, эмоциялық тұрақтылығы мен өз-өзін басқару қабілеттері ерекше маңызды болып отыр. Мектеп ортасында кездесетін агрессия мәселесі – олардың психологиялық дамуына әсер ететін негізгі факторлардың бірі. Сол себепті «Адал азамат» бағдарламасының аясында оқушыларға агрессияның алдын алу жолдары мен эмоцияны реттеу тәсілдері көрсетілді. Тренинг барысында әртүрлі әдістер мен жаттығулар қолданылды. “Тыныс алу техникасы” жаттығуы оқушыларға стресс пен ашулануды бақылауға, тыныс алу арқылы эмоцияларын тыныштандыруға мүмкіндік берді. Сонымен қатар, “Ашуымды қағазға жазамын” әдісі арқылы балалар өз ренішін және негативті сезімдерін қауіпсіз түрде сыртқа шығаруды үйренді. Сонымен бірге “Мен-тұжырымдамасын” қалыптастыру, ашық пікір алмасу және өз ойын мәдени түрде жеткізу дағдыларына баулу техникалары іске асырылды. Бұл әдістер оқушыларға эмоцияларын тануға, өз сезімдерін дұрыс бағытта қолдануға және конфлик жағдайларында бейбіт шешім қабылдауға көмектесті. Тренинг соңында оқушылар өз ой-пікірлерімен бөлісіп, кері байланыс жасады. Олар эмоцияларын басқару мен агрессияны бейбіт жолмен шешу тәсілдерін түсінгендерін айтып, күнделікті өмірде қолданып көруге ниетті екенін білдірді. Мұндай іс-шаралар мектеп ортасында сенімді әрі қауіпсіз психологикалық атмосфера қалыптастыруға, балалардың саналы және мәдениетті азамат болып қалыптасуына жағдай жасайды.
«Адал азамат» бағдарламасының мәні – жас ұрпақты тек біліммен ғана емес, сонымен бірге эмоционалдық мәдениет, өз-өзін басқару қабілеті және қоғамдағы бейбіт қатынастарды сақтау арқылы тәрбиелеу. Психологиялық тренингтер балалардың құқықтары мен міндеттерін түсінуін, өз сезімдері мен эмоцияларын басқаруды, сондай-ақ әріптестері мен сыныптастарымен сыйластықта өмір сүруді үйретеді. Бұл өз кезегінде олардың болашақтағы жауапкершілікке толы, саналы азамат ретінде қалыптасуына ықпал етеді.
