ШЫМКЕНТТЕ МАХАББАТ ПЕН САТҚЫНДЫҚ ТУРАЛЫ ПОЭТИКАЛЫҚ ТОЛҒАУ ПРЕМЬЕРАСЫ ӨТТІ
Театр өнері – мәдениеттің ажырамас бөлігі, адамзат тарихындағы ең ежелгі өнер түрлерінің бірі. Ол қоғамдағы әлеуметтік және рухани мәселелерді бейнелеп, көрермендердің эмоцияларын оятып, ойлануға шақырады. Қазақстанда театр өнері ұлттық мәдениетті дамыту және ұрпақтар арасындағы байланысты нығайту құралы ретінде ерекше маңызға ие. Театр мәдени мұра ретінде халықтың рухани байлығын көрсетіп, қоғамдағы маңызды мәселелерді көркемдік тұрғыда ашып көрсетеді. Театр өнері халықтың мәдениетін, дәстүрлерін, рухани құндылықтарын сақтауға және дамытуға мүмкіндік береді. Сахналық қойылымдар арқылы ұлттық әдебиет, аңыздар, тарихи оқиғалар көркемдік тұрғыдан қайта жанданып, бүгінгі көрерменге ұсынылады. Театр өнері арқылы қазақ халқының мәдени мұрасы жас ұрпаққа жеткізіледі. Театр қойылымдары қоғамдағы өзекті мәселелерді көтеріп, көрермендерді ойлануға, талдауға, қорытынды жасауға шақырады. Әлеуметтік, моральдық, философиялық тақырыптарды сахналау арқылы театр қоғамдық санаға әсер етеді, адамдардың өмірлік құндылықтары мен ұстанымдарын қайта қарауға ықпал етеді.
Театр өнері көрермендерді эмоциялық және рухани тұрғыдан байытады. Сахнадағы актерлердің ойындары, музыка, декорациялар көрермендерді басқа бір әлемге апарып, оларды күнделікті өмірдің күйбеңінен арылтады. Театр қойылымдары адам эмоцияларын оятып, көрерменге жаңа әсерлер мен шабыт сыйлайды. Театр – адамдарды бір ортаға біріктіріп, әлеуметтік байланысты нығайтуға септігін тигізеді. Театр қойылымдарына бірге бару, қойылымдар туралы талқылау арқылы адамдар арасындағы әлеуметтік қарым-қатынас күшейеді. Сонымен қатар, театр қоғамдық маңызды оқиғалар мен мәселелерді бірлесіп талқылауға мүмкіндік береді. Қазақстанда театр өнері үлкен құрметке ие және мәдениеттің маңызды салаларының бірі болып табылады. Алғашқы кәсіби театрлар ХХ ғасырдың басында құрылды, солардың ішінде Қазақ драма театры қазақ өнері мен мәдениетін дамытуда үлкен рөл атқарды. Бүгінде Қазақстанда көптеген драма, опера және балет театрлары жұмыс істейді, олар ұлттық және әлемдік классикалық шығармаларды сахналайды. Астана Опера және Алматыдағы Абай атындағы Қазақ мемлекеттік академиялық опера және балет театры сияқты ірі театрлар еліміздегі мәдени өмірдің орталықтары болып табылады. Сонымен қатар, аймақтарда да көптеген театрлар жұмыс істеп, халыққа мәдени қызмет көрсетуде маңызды рөл атқарады. Театрлар түрлі фестивальдерге қатысып, халықаралық сахналарда өнер көрсетіп, қазақ мәдениетін әлемге танытуда. Театр өнерін дамыту үшін жас таланттарды қолдау және тәрбиелеу маңызды. Мектептерде, колледждерде және жоғары оқу орындарында актерлік шеберлік, сахналық өнер пәндерін енгізу арқылы жас өнерпаздарды тәрбиелеуге болады. Жас дарындарға арналған фестивальдер мен байқаулар олардың кәсіби деңгейін арттырып, шығармашылық жолында қолдау көрсетуге мүмкіндік береді. Театр қойылымдарында заманауи технологияларды қолдану көрермендердің қызығушылығын арттырып, өнердің әсерін күшейтеді. Лазерлік шоу, мультимедиялық проекциялар, дыбыс және жарық эффектілері арқылы сахналық қойылымдардың көркемдік сапасын арттыруға болады. Бұл көрермендерге жаңа тәжірибе ұсынып, театр өнерін заманауи деңгейге көтереді. Қазақстан театрларының халықаралық деңгейде танылуы үшін өзге елдермен мәдени ынтымақтастық орнату маңызды. Халықаралық фестивальдерге қатысу, гастрольдік сапарлар ұйымдастыру арқылы қазақ театр өнерін шетелдік көрермендерге танытуға болады. Сонымен қатар, шетелдік режиссерлер мен актерлерді шақырып, бірлескен жобалар жасау да театр өнерін дамытуға ықпал етеді. Театрдың қоғамдағы рөлін арттыру үшін көрермендер аудиториясын кеңейту қажет. Бұл мақсатта мектеп оқушыларына, студенттерге және әртүрлі әлеуметтік топтарға театр қойылымдарын қолжетімді ету, арнайы жеңілдіктер мен акциялар ұйымдастыру маңызды. Театр мәдениетінің кеңінен танылуы халықтың жалпы мәдени деңгейін көтеруге ықпал етеді. Театр өнері – қоғамның рухани және мәдени өмірінің маңызды бөлігі. Ол адамдарды біріктіріп, рухани байытуға, маңызды мәселелерді көтеруге және көркемдік ләззат сыйлауға бағытталған. Қазақстанда театр өнерін дамыту бағытында жас таланттарды қолдау, заманауи технологияларды қолдану, халықаралық ынтымақтастық орнату және көрермендер аудиториясын кеңейту сияқты шаралар жүзеге асырылуда. Театр өнерін дамыту арқылы біз қоғамымыздың рухани байлығын сақтап, мәдени деңгейін арттыра аламыз. Бұл тұрғыдан келгенде, еліміздің үшінші мегаполисінде атқарылып жатқан шаралардың қатары қалың. Бүгінгі Шымкент мәдени орталыққа айналып келеді. Көптеген игі бастамалар көтеріліп, тың туындылар сахналанып жатыр. Мәселен, жуырда Ж.Шанин атындағы Шымкент қалалық академиялық қазақ драма театрында белгілі ақын Ханбибі Есенқарақызының «Сендегі мені өшірме» атты поэтикалық толғауының премьерасы өтті. Спектакль махаббат, сатқындық және жастар арасындағы ажырасу мәселелерін бейнелей отырып, қоғамдағы терең өзгерістер мен құндылықтарды поэзия және музыка тілімен суреттейді. Көрермендер қойылым арқылы адам жанының күрделі иірімдері мен терең ойлар әлеміне сапар шекті. Толғанысқа толы сахна мен ерекше поэтикалық мәтін қойылымның әсерлілігін арттырды. Қойылым соңында Шымкент қаласы әкімінің орынбасары Сәрсен Абайұлы Құранбек құттықтау сөз сөйлеп, спектакльдің көркемдік жетекшісі Мөлдір Айдарқызы мен театр ұжымын шығармашылық табыстарымен құттықтады. Ол қойылымның қоғамдағы мәдени және рухани маңыздылығын атап өтті. Пьесаның авторы, белгілі ақын Ханбибі Есенқарақызы, театр ұжымына ризашылығын білдіріп, бұл шығармашылық ынтымақтастықтың өзіндік орны бар екенін жеткізді. Шара барысында театр ұжымына Шымкент қаласының әкімі Ғабит Әбдімәжитұлы Сыздықбеков және Өзбекәлі Жәнібеков атындағы Оңтүстік Қазақстан университеті атынан ықылас гүлдері табысталды. Бұл поэтикалық толғау махаббаттың мәнін, адамдар арасындағы қарым-қатынастардың нәзік те күрделі қырларын қайта саралауға түрткі болған маңызды мәдени оқиға ретінде есте қалды. Айта кету керек, жуырда Шымкентте ақын, халықаралық «Алаш» әдеби сыйлығының лауреаты, Қазақстан Республикасының еңбек сіңірген қайраткері Ханбибі Есенқарақызының 75 жылдығына арналған «Хан қызындай Ханбибі» шығармашылық кеші өтті. Салтанатты жиынға қатысқан қала әкімі Ғабит Сыздықбеков ақын шығармашылығының маңыздылығына тоқталды. “Ақынның қаламынан туған шығармалар оқырманды терең ойға жетелейді. Поэзия әлемінде қайсарлық пен адалдықтың символы болған Ханбибі Есенқарақызы қазақ әйелінің бейнесін айқындаған «Жібек» повесті арқылы проза жанрында да айрықша із қалдырды. Қаламыңыздан шыққан «Алтынай», «Нурикамал», «Қадиша» сынды әндер халық арасында кең таралды. Сіз ұлт мұрасын дамыту жолында аянбай тер төктіңіз. Саяси қуғын-сүргін құрбандарына қатысты тарихи шындықты қалпына келтіру жолында үздіксіз қызмет еттіңіз. «Қазақ тілі» қоғамында мемлекеттік тілдің кең ауқымда қолданысқа енуіне үлес қостыңыз. Бұл рухани тұтастық пен ұлт болмысын сақтаудағы маңызды қадам деп білемін” деді қала әкімі. Мерейтойлық іс-шаралар аясында 60 ақынның қатысуымен «Ханбибі биігі» атты жыр мүшәйрасы өтті. Сондай-ақ Оңтүстік Қазақстан педагогикалық университетінің ұйымдастыруымен халықаралық ғылыми-теориялық конференция ұйымдастырылды.
