ТУРИЗМ САЛАСЫНА 60 МЛРД ТЕҢГЕГЕ ЖУЫҚ ИНВЕСТИЦИЯ ТАРТЫЛАДЫ
Түркістан облысы соңғы жылдары еліміздің басты туристік орталықтарының біріне айналып келеді. Тарихи және табиғи мұраларға бай өлке инфрақұрылымдық жаңғырулар мен жаңа инвестициялық жобалардың арқасында ішкі және халықаралық деңгейде туристердің назарын аудара бастады. Облыстық туризм басқармасының мәліметінше, 2025 жылдың алғашқы тоқсанында аймаққа келген қонақтар саны мен саланың экономикалық көрсеткіштері тұрақты өсімге қол жеткізген.
Ресми деректерге сүйенсек, өңірде қазіргі таңда 245 қонақ үй, 298 демалыс орны және 117 емдік-сауықтыру кешені жұмыс істейді. Бұл тек сандық арту ғана емес, сапалық тұрғыдан да өзгерістерді көрсетіп отыр. Қонақүйлер мен демалыс орындарының инфрақұрылымы халықаралық талаптарға бейімделіп, туристерге жайлы жағдай жасалуда. 2025 жылдың алғашқы тоқсанында 61,3 мың турист қонақүйлерде орналастырылған. Бұл өткен жылдың сәйкес кезеңімен салыстырғанда 1,5 пайызға көп. Жалпы туризм саласында көрсетілген қызмет көлемі жыл басынан бері 1,5 млрд теңгені құрап, өткен жылмен салыстырғанда 1,3 пайызға өскен. Әсіресе табиғи аумақтарға келушілердің саны 80,2 мың адамға жеткені байқалады. Ал тарихи орындарға келген туристер саны 520,7 мыңға дейін көтерілген. Бұл көрсеткіш Түркістанның тек табиғатымен ғана емес, тарихи-мәдени мұрасымен де ерекше тартымды екенін айғақтайды. Аймақтың туристік әлеуетін арттыруда инвестициялардың рөлі ерекше. 2025 жылдың өзінде салаға тартылған инвестициялар көлемі 33 млрд теңгеге жеткен. Бұл қаражат жаңа қонақүйлер мен демалыс аймақтарының құрылысын жандандыруға бағытталған. Мәселен, «Lords Heir», «Khan Palace 2», «Yassy Hall and Apartments» сияқты заманауи қонақүйлер мен «Болашақ құрылыс» ЖШС-нің демалыс аймағы туристерді қабылдауға дайындалуда.
Айта кетерлігі, шетелдік туристердің саны да айтарлықтай өсіп келеді. «E-qonaq» жүйесінің деректеріне сәйкес, 2025 жылдың алғашқы алты айында өңірге 24 мыңға жуық шетелдік келген. Бұл көрсеткіш былтырғы жылмен салыстырғанда екі есеге артқанын білдіреді. Қытай, Жапония, Италия, Германия сияқты елдерден туристердің қызығушылығы өсіп, Түркістан халықаралық туризм картасында жаңа бағыт ретінде қалыптасып келеді. Мұндай өсімнің бір себебі – халықаралық ақпарат құралдарында Түркістанның кеңінен насихатталуы және аймақтың туристік әлеуетінің жүйелі түрде таныстырылуы. Биыл өңірде туризмді одан әрі дамытуға бағытталған бірқатар ауқымды жобалар қолға алынбақ. Солардың қатарында ескек есу каналы, Қолөнершілер қалашығы және Күлтөбе қалашығы жобасы бар. Бұл нысандар іске қосылған жағдайда, облыстың туристік инфрақұрылымы жаңа деңгейге көтеріліп, келушілерге ұсынылатын қызмет түрлері көбейе түседі. 2025 жылы жалпы саны 27 инвестициялық жоба жүзеге асырылмақ. Бұл жобаларға 26,3 млрд теңге көлемінде қаражат тартылып, 1130 жаңа жұмыс орны ашылады деп күтілуде. Сонымен қатар туристік инфрақұрылым саласында құны 11,3 млрд теңгені құрайтын 6 ірі жоба іске асырылмақ. Бұл қадамдар тек туристерді тартумен шектелмей, жергілікті халықтың да жұмыспен қамтылуына және әлеуметтік-экономикалық ахуалдың жақсаруына ықпал етеді. Жыл соңына қарай Түркістан облысына келетін туристердің саны 350 мыңға жетеді деген болжам жасалуда. Бұл көрсеткіш аймақтың туристік тартымдылығының артып келе жатқанын және қабылданып жатқан шаралардың тиімділігін көрсетеді. Ал саладағы жалпы инвестиция көлемін 55,8 млрд теңгеге жеткізу межеленген.
Түркістан облысының туризм саласындағы табыстары бірнеше маңызды факторға негізделген. Біріншіден, тарихи және мәдени мұраларды сақтау мен жаңғыртуға басымдық берілуі. Қожа Ахмет Ясауи кесенесі, Күлтөбе қалашығы, көне шаһарлардың ізі туристер үшін ерекше қызығушылық тудырады. Екіншіден, табиғи аумақтардағы демалыс мүмкіндіктері – таулы аймақтар, өзен-көлдер мен шипалы минералды сулары аймақтың тартымдылығын арттырады. Үшіншіден, туристік инфрақұрылымның жүйелі дамуы. Жаңа қонақүйлер, демалыс аймақтары, мәдени-спорттық нысандардың ашылуы сапалы қызмет көрсету деңгейін көтеруде. Сарапшылардың пікірінше, Түркістандағы туризм саласының дамуы тек экономикалық емес, мәдени және әлеуметтік тұрғыдан да маңызды. Бұл бағыттағы жобалар халықтың жұмыспен қамтылуына, шағын және орта бизнестің дамуына, ұлттық мәдениеттің кеңінен танылуына ықпал етуде.
