АРДАГЕРЛЕР ЖОЛДАУҒА ҚОЛДАУ БІЛДІРДІ

Шымкент қаласының ардагерлері мемлекет басшысы Қасым-Жомарт Тоқаевтың «Әділетті мемлекет. Біртұтас ұлт. Берекелі қоғам» атты Жолдауында  айтылған мәселелер жөнінде өз ойларын  ортаға салу үшін басқосты. Жиынды қалалық ардагерлер кеңесінің төрағасы Кенжехан Төлебаев жүргізді.

Жиында ардагерлер кеңесінің мүшелері Жолдаудағы 5 бағыт бойынша баяндама жасады.  Әр ардагер өз саласына қатысты бағытқа пікір білдірді. Атап айтсақ,  алқа мәжілісінде сөз алған ардагер судья Ақылбек Елшібаев.  аудандық сот мен сот алқасы төрағаларын тағайындауға кеңінен тоқталды. «Біріншіден – аудандық сотта да, алқалы сот төрағасы тағайындалмай, өзара ұжымда сайлауды ұсынды. Нәтижесінде, аудандық сот пен сот алқасының төрағалары «аға судья» деп аталуы мүмкін. Екіншіден – барлық деңгейдегі судьялардың мәртебесін теңестіруді алға тартты. Қазір аудандық соттар бірнеше бағытқа бөлінген. Азаматтық сот, экономикалық, қылмыстық сот тағы да өзге бағыттар бар. Олардың еңбекақысы әр түрлі. Енді олардың мәртебесі де, еңбекақысы да теңестіріледі. Президент тапсырмасы бойынша енді судьялардың деңгейі артып, одан жоғары тұрған биліктің сот жұмысына ықпал етуіне тыйым салынады» деді ардагер.

Аға буын өкілдерінің пайымынша, биылғы Жолдау қоғамдағы ең өзекті мәселені қамтуымен де елдің көңілінен шыққан құжат болды. Бұл — ардагерлердің ортақ пікірі. Басқосу соңында қариялар бата беріп, Жолдауға қолдау білдірді.

Жалпы мемлекет басшысының Жолдауында көптің көкейінде жүрген, жұрт әлеуметтік желіде жазып жүрген өзекті де өткір мәселелер қамтылды. Сәйкесінше, қазіргі уақытта еліміздің түкпір-түкпірінде мемлекет басшысы жариялаған маңызды құжатта айтылған бағыттарды терең талқылау үрдісі жүріп жатыр. Мұның өзі Жолдауда қоғам күткен бастамалардың қамтылғанын аңғартса керек…