АНА МЕН БАЛА САУЛЫҒЫ БАСТЫ НАЗАРДА
Түркістан облысында ана мен бала денсаулығын қорғау – тек денсаулық сақтау саласындағы жұмыс емес, бұл – өңірдің әлеуметтік саясатының өзегі, келешекке бағытталған стратегиялық басымдық. Облыс әкімі Нұралхан Көшеровтың төрағалығымен өткен жиында осы бағыттағы жетістіктер мен алда тұрған міндеттер кеңінен сараланды.
Бүгінде Түркістан облысында 2,2 миллионнан астам халық тұрады. Бұл – Қазақстан бойынша ең тығыз қоныстанған өңірлердің бірі. Оның ішінде репродуктивті жастағы әйелдер – 433 мыңнан астам, 18 жасқа дейінгі балалар саны – 900 мыңға жуық, жыл сайын дүниеге келетін сәбилер саны – 54 мыңға жуық. Бұл көрсеткіштер өңірдің жоғары демографиялық әлеуетін айғақтайды. Алайда бұл – бір жағынан зор мүмкіндік болса, екінші жағынан – денсаулық сақтау жүйесіне артылатын үлкен жауапкершілік. Жиында сөз сөйлеген облыс әкімі Нұралхан Көшеров ана мен бала денсаулығы – ұлттың болашағы екенін баса айтты: «Ана мен баланың денсаулығы – қоғамның әл-ауқаты мен болашағының айнасы. Бұл салада тек статистикалық көрсеткіштерге сүйенбей, өмірлік маңызы бар нақты шешімдер қабылдауымыз керек. Инфрақұрылым, кадр және технология – үйлесімді жұмыс істеуі қажет». Бұл сөздер өңір басшысының тек басқарушылық емес, стратегиялық көзқарасын көрсетеді. Яғни, денсаулық сақтау жүйесін тек қызмет көрсететін мекемелер жиынтығы емес, қоғам тұрақтылығы мен демографиялық дамудың іргетасы ретінде қарайды. Облыстық денсаулық сақтау басқармасының басшысы Асхан Байдувалиев жиында айтқандай, соңғы екі жылда ана мен бала өлімінің көрсеткіші тұрақты түрде төмендеп келеді. Бұл – өңірдегі медициналық қызмет сапасының артуының нақты дәлелі. Төмендеу себептері — профилактикалық скринингтің кеңеюі, перинаталдық көмек сапасының жақсаруы, кадр дайындығы мен оқыту жүйесінің жаңаруы. Жүктілік кезінде ұрықтың даму ақауларын ерте анықтау – ана мен нәресте өмірін сақтау жолындағы шешуші құрал. Түркістан облысында бүгінде пренаталдық скринингпен қамту 88%-ға жеткен. Бұл – әлемдік стандарттарға жақындаған жоғары көрсеткіш.
2021 жылдан бастап жүзеге асып жатқан «Аңсаған сәби» бағдарламасы – бедеулікпен күрес бағытындағы әлеуметтік маңызды жоба. Түркістан облысында бұл бағдарлама аясында 780 бала дүниеге келген. Оның ішінде 84 егіз және 2 үшем тіркелген. Бағдарлама шеңберінде экстракорпоральды ұрықтандыру (ЭКО) қызметтері Міндетті әлеуметтік медициналық сақтандыру (МӘМС) аясында тегін көрсетіледі. Бұл – медициналық көмектің қолжетімділігі мен әлеуметтік әділеттілікті қамтамасыз етудің үлгісі. Ана мен бала денсаулығын қорғау – кешенді тәсілді талап ететін сала. Мұнда диагностикалық жабдықтың заманауилығы, білікті дәрігерлер мен акушер-гинекологтардың саны, перзентханалар мен емханалар желісі – бәрі бір-бірімен тығыз байланысты. Түркістан облысында осы үш бағытта да үйлесімді даму байқалады. Бұл өңірдің денсаулық сақтау саласын сапалы деңгейге көтеруге жол ашты. Ана мен баланың амандығы – тек отбасының ғана емес, тұтас қоғамның болашағы. Түркістан облысы бұл қағиданы нақты іспен дәлелдеп келеді. Әкімдік, денсаулық сақтау басқармасы және медицина мамандарының үйлесімді жұмысы арқасында өңірде ана мен бала өлімінің төмендеуі, пренаталдық скринингтің кеңеюі және ЭКО арқылы дүниеге келген балалар санының артуы – өмір сапасының айқын көрсеткіші. Түркістан облысының бұл тәжірибесі Қазақстанның өзге өңірлеріне де үлгі бола алады. Себебі дені сау ұлт – ел болашағының негізі.
