ТҮРКІСТАНДА ДӘСТҮРЛІ ТАМЫЗ КОНФЕРЕНЦИЯСЫ ӨТТІ
Жаңа оқу жылы қарсаңында Түркістанда өткен «Білім келешегі: адал азамат, кәсіби маман» тақырыбындағы дәстүрлі облыстық тамыз педагогикалық кеңесі білім саласындағы ең өзекті мәселелер мен жаңа бастамаларды талқылайтын басты диалог алаңына айналды. Бұл жиынға облыс әкімі Нұралхан Көшеров, ҚР Оқу-ағарту бірінші вице-министрі Майра Мелдебекова, «НЗМ» Педагогикалық шеберлік орталығының директоры Толқын Айдосова, облыс прокурорының орынбасары Дәулет Тлемисов және өзге де қоғам қайраткерлері қатысты. Пленарлық отырысты Түркістан облысы білім басқармасы басшысының міндетін атқарушы Ғалымжан Орынов жүргізді.
Маңызды кеңеске 1000-ға жуық ұстаз тікелей қатысып, тағы 20 мыңнан астам педагог онлайн форматта қосталды. Бұл – білім саласындағы пікірталастар мен жаңа бағыттарды талқылауға деген үлкен сұранысты айқындайды. Кеңестің алдында қатысушылар инновациялық жобалардың көрмесін аралады. Мұнда оқушыларға арналған алғашқы жасанды интеллект негізіндегі репетитор, кәсіби бағдар беру мен психологиялық қолдау көрсететін стартаптар, интеграцияланған цифрлық экожүйе, ғылыми оқулықтар мен техникалық және кәсіптік білім беру ұйымдарының жобалары таныстырылды. Бұл – білім беру саласына жаңа технологиялардың белсенді еніп жатқанын дәлелдейтін нақты мысал. Өз сөзінде облыс әкімі Нұралхан Көшеров педагогтарды жаңа оқу жылымен құттықтап, білім беру саласында атқарылған жұмыстар мен алдағы жоспарларға тоқталды. Әкімнің айтуынша, Түркістанда Оңтүстік Кореяның беделді «Woosong Kazakhstan» IT университеті ашылып, оған 100 грант бөлінді. Бұл – өңір жастарына заманауи IT-білім алуға жасалған үлкен мүмкіндік. Сонымен қатар, облыста білім беру саласына 2024 жылы 747,7 млрд теңге бөлініп, бұл облыстық бюджеттің 55 пайызын құраған. Мұндай инвестиция – болашақ ұрпаққа арналған нақты қолдау. Түркістан облысы мектепке дейінгі тәрбиеде де алдыңғы қатарда. 6 жасқа дейінгі балаларды қамту көрсеткіші 99 пайызға жетіп, бұл республика бойынша ең жоғары деңгейге шықты. Жаңа оқу жылы қарсаңында 17 білім нысанының құрылысы жүргізіліп жатыр, өткен жылы 13 мектеп пайдалануға берілсе, биыл тағы 16 мектеп ашылмақ. «Келешек мектептері» ұлттық жобасы аясында 29 жаңа жайлы мектеп салынып, үш ауысымдық және апатты мектептер мәселесін шешуге нақты қадам жасалды. Мектептерді жаңғырту да маңызды бағыттардың бірі. Президенттің тапсырмасына сәйкес үш жылда 115 мектеп толық реновациядан өтпек. Биылдың өзінде 100 мектеп күрделі жөндеуден өткізілуде. Бұл – ауыл мен қала балаларына тең жағдай жасауға бағытталған шаралар. Оқушылардың қауіпсіздігіне де ерекше көңіл бөлініп отыр. Мектептерге бейнебақылау жүйелері, турникеттер, дабыл түймелері мен күзет құралдары орнатылған. 2023–2024 жылдары осы мақсатқа 3 млрд теңге бөлінген. Бұл – білім беру мекемелерінде балалардың қауіпсіздігін қамтамасыз етуге бағытталған маңызды инвестиция.
Сонымен қатар, дуалды оқыту жүйесін жетілдіру, жаңа мамандықтар ашу – кеңесте талқыланған өзекті тақырыптардың бірі болды. Облыста 35 колледж 654 кәсіпорынмен келісімшартқа отырып, 6 жаңа жұмысшы мамандық енгізді. Биылғы 15 500 гранттың 9500-і жұмысшы мамандықтарға берілді. Бұл – нарықтағы еңбек тапшылығын шешуге, жастарды нақты сұранысқа ие мамандықтарға бағыттауға арналған қадам. Кеңесте білім саласына енгізілген ваучерлік қаржыландырудың тиімділігі де айтылды. Бұл жүйе барлық балабақшаларда іске қосылып, қаражаттың ашық әрі әділ бөлінуіне жол ашты. Әсіресе ата-аналар үшін бұл жүйе – қызмет сапасының артуына мүмкіндік берді. Жиын соңында облыс әкімі білім саласындағы басты міндеттердің бірі сапа мен ашықтықты арттыру екенін атап өтті. Ұстаздардың кәсіби еңбегін бағалау мақсатында салада ерекше көзге түскен педагогтер ҚР «Ерен еңбегі үшін» медалімен, облыс әкімінің алғыс хатымен, «Білім беру ісінің құрметті қызметкері» төсбелгісімен марапатталды. Бұл марапаттар – ұстаздардың қоғамдағы орны мен еңбегінің маңыздылығын айқындайды. Түркістандағы педагогикалық тамыз кеңесі білім беру саласының даму динамикасын көрсететін айқын алаң болды. Жиын барысында мемлекеттік саясаттың стратегиялық бағыттары – білім сапасын арттыру, мектептерді жаңғырту, қауіпсіздікті қамтамасыз ету, жаңа технологияларды енгізу және еңбек нарығына бейімделген мамандар даярлау мәселелері нақты талқыланды. Мұндай кеңестердің артықшылығы – білім беру процесіне тікелей қатысушылардың, яғни ұстаздардың пікірін ескере отырып, саланың даму бағытын айқындауында.
